ตา วุตฺตา ตา วกฺขนฺติ ‘ครุโก โข, ภคินิโย, สงฺฆเภโท วุตฺโต ภควตาฯ มา ภคินีนํ สงฺฆเภโท รุจฺจิตฺถา’ติฯ กริสฺสนฺติ ตาสํ วจนํ, สุสฺสูสิสฺสนฺติ, โสตํ โอทหิสฺสนฺตี’’ติ, ปกฺกมิตพฺพํฯ อนาปตฺติ วสฺสจฺเฉทสฺสติฯ

อิธ ปน, ภิกฺขเว, วสฺสูปคโต ภิกฺขุ สุณาติ – ‘‘อมุกสฺมิํ กิร อาวาเส สมฺพหุลาหิ ภิกฺขุนีหิ สงฺโฆ ภินฺโน’’ติฯ ตตฺร เจ ภิกฺขุโน เอวํ โหติ – ‘‘ตา โข เม ภิกฺขุนิโย มิตฺตาฯ ตาหํ วกฺขามิ ‘ครุโก โข, ภคินิโย, สงฺฆเภโท วุตฺโต ภควตาฯ มา ภคินีนํ สงฺฆเภโท รุจฺจิตฺถา’ติฯ กริสฺสนฺติ เม วจนํ, สุสฺสูสิสฺสนฺติ, โสตํ โอทหิสฺสนฺตี’’ติ, ปกฺกมิตพฺพํฯ อนาปตฺติ วสฺสจฺเฉทสฺสติฯ

อิธ ปน, ภิกฺขเว, วสฺสูปคโต ภิกฺขุ สุณาติ – ‘‘อมุกสฺมิํ กิร อาวาเส สมฺพหุลาหิ ภิกฺขุนีหิ สงฺโฆ ภินฺโน’’ติฯ ตตฺร เจ ภิกฺขุโน เอวํ โหติ – ‘‘ตา โข เม ภิกฺขุนิโย น มิตฺตาฯ อปิ จ, ยา ตาสํ มิตฺตา ตา เม มิตฺตาฯ ตาหํ วกฺขามิฯ ตา วุตฺตา ตา วกฺขนฺติ ‘ครุโก โข, ภคินิโย [อยฺยาโย (สี.)], สงฺฆเภโท วุตฺโต ภควตา; มา ภคินีนํ [อยฺยานํ (สี.)] สงฺฆเภโท รุจฺจิตฺถา’ติฯ กริสฺสนฺติ ตาสํ วจนํ, สุสฺสูสิสฺสนฺติ, โสตํ โอทหิสฺสนฺตี’’ติ, ปกฺกมิตพฺพํฯ อนาปตฺติ วสฺสจฺเฉทสฺสาติฯ

สงฺฆเภเท อนาปตฺติวสฺสจฺเฉทวาโร นิฏฺฐิโตฯ

115. วชาทีสุ วสฺสูปคมนํ

[203] เตน โข ปน สมเยน อญฺญตโร ภิกฺขุ วเช วสฺสํ อุปคนฺตุกาโม โหติฯ ภควโต เอตมตฺถํ อาโรเจสุํฯ อนุชานามิ, ภิกฺขเว, วเช วสฺสํ อุปคนฺตุนฺติฯ วโช วุฏฺฐาสิฯ ภควโต เอตมตฺถํ อาโรเจสุํฯ อนุชานามิ, ภิกฺขเว, เยน วโช เตน คนฺตุนฺติฯ

เตน โข ปน สมเยน อญฺญตโร ภิกฺขุ อุปกฏฺฐาย วสฺสูปนายิกาย สตฺเถน คนฺตุกาโม โหติฯ ภควโต เอตมตฺถํ อาโรเจสุํฯ อนุชานามิ, ภิกฺขเว, สตฺเถ วสฺสํ อุปคนฺตุนฺติฯ

เตน โข ปน สมเยน อญฺญตโร ภิกฺขุ อุปกฏฺฐาย วสฺสูปนายิกาย นาวาย คนฺตุกาโม โหติฯ ภควโต เอตมตฺถํ อาโรเจสุํฯ อนุชานามิ, ภิกฺขเว, นาวาย วสฺสํ อุปคนฺตุนฺติฯ

วชาทีสุ วสฺสูปคมนํ นิฏฺฐิตํฯ

116. วสฺสํ อนุปคนฺตพฺพฏฺฐานานิ

[204] เตน โข ปน สมเยน ภิกฺขู รุกฺขสุสิเร วสฺสํ อุปคจฺฉนฺติฯ มนุสฺสา อุชฺฌายนฺติ ขิยฺยนฺติ วิปาเจนฺติ – ‘‘เสยฺยถาปิ ปิสาจิลฺลิกา’’ติฯ ภควโต เอตมตฺถํ อาโรเจสุํฯ น, ภิกฺขเว, รุกฺขสุสิเร วสฺสํ อุปคนฺตพฺพํฯ โย อุปคจฺเฉยฺย, อาปตฺติ ทุกฺกฏสฺสาติฯ

เตน โข ปน สมเยน ภิกฺขู รุกฺขวิฏภิยา วสฺสํ อุปคจฺฉนฺติฯ มนุสฺสา อุชฺฌายนฺติ ขิยฺยนฺติ วิปาเจนฺติ – ‘‘เสยฺยถาปิ มิคลุทฺทกา’’ติฯ ภควโต เอตมตฺถํ อาโรเจสุํฯ น, ภิกฺขเว, รุกฺขวิฏภิยา วสฺสํ อุปคนฺตพฺพํฯ โย อุปคจฺเฉยฺย, อาปตฺติ ทุกฺกฏสฺสาติฯ

เตน โข ปน สมเยน ภิกฺขู อชฺโฌกาเส วสฺสํ อุปคจฺฉนฺติฯ เทเว วสฺสนฺเต รุกฺขมูลมฺปิ นิพฺพโกสมฺปิ อุปธาวนฺติฯ ภควโต เอตมตฺถํ อาโรเจสุํฯ น, ภิกฺขเว, อชฺโฌกาเส วสฺสํ อุปคนฺตพฺพํฯ โย อุปคจฺเฉยฺย, อาปตฺติ ทุกฺกฏสฺสาติฯ

เตน โข ปน สมเยน ภิกฺขู อเสนาสนิกา วสฺสํ อุปคจฺฉนฺติฯ สีเตนปิ กิลมนฺติ, อุณฺเหนปิ กิลมนฺติฯ ภควโต เอตมตฺถํ อาโรเจสุํฯ น, ภิกฺขเว, อเสนาสนิเกน วสฺสํ อุปคนฺตพฺพํฯ โย อุปคจฺเฉยฺย, อาปตฺติ ทุกฺกฏสฺสาติฯ

เตน โข ปน สมเยน ภิกฺขู ฉวกุฏิกาย วสฺสํ อุปคจฺฉนฺติฯ มนุสฺสา อุชฺฌายนฺติ ขิยฺยนฺติ วิปาเจนฺติ – ‘‘เสยฺยถาปิ ฉวฑาหกา’’ติฯ ภควโต เอตมตฺถํ อาโรเจสุํฯ น, ภิกฺขเว, ฉวกุฏิกาย วสฺสํ อุปคนฺตพฺพํฯ โย อุปคจฺเฉยฺย, อาปตฺติ ทุกฺกฏสฺสาติฯ

เตน โข ปน สมเยน ภิกฺขู ฉตฺเต วสฺสํ อุปคจฺฉนฺติฯ มนุสฺสา อุชฺฌายนฺติ ขิยฺยนฺติ วิปาเจนฺติ – ‘‘เสยฺยถาปิ โคปาลกา’’ติฯ ภควโต เอตมตฺถํ อาโรเจสุํฯ น, ภิกฺขเว, ฉตฺเต วสฺสํ อุปคนฺตพฺพํฯ โย อุปคจฺเฉยฺย, อาปตฺติ ทุกฺกฏสฺสาติฯ

เตน โข ปน สมเยน ภิกฺขู จาฏิยา วสฺสํ อุปคจฺฉนฺติฯ มนุสฺสา อุชฺฌายนฺติ ขิยฺยนฺติ วิปาเจนฺติ – ‘‘เสยฺยถาปิ ติตฺถิยา’’ติฯ ภควโต เอตมตฺถํ อาโรเจสุํฯ น, ภิกฺขเว, จาฏิยา วสฺสํ อุปคนฺตพฺพํฯ โย อุปคจฺเฉยฺย, อาปตฺติ ทุกฺกฏสฺสาติฯ

วสฺสํ อนุปคนฺตพฺพฏฺฐานานิ นิฏฺฐิตาฯ